पालघर : पालघर जिल्हा परिषदेची सर्वसाधारण सभा पालघरमधील संकुल सभागृहात पार पडली. पालघर जिल्ह्यात स्वच्छ भारत मिशन (ग्रामीण) अंतर्गत दोन ऑक्टोबर २०१४नंतर शौचालय बांधकाम करण्यात आलेल्या कुटुंबांचे फोटो केंद्र सरकारच्या वेबसाइटवर अपलोड करण्याला गती देण्याचे काम सुरू आहे. जिल्ह्यातील १०० टक्के शौचालयांचे फोटो अपलोड केलेल्या वसई तालुक्यातील शिरवली ग्रामपंचायतचे ग्रामसेवक एस. आर. मोरे. यांचा सत्कार जिल्हा परिषद अध्यक्षा सुरेखाताई थेतले यांच्या हस्ते सन्मानपदक देऊन करण्यात आला. पालघर तालुक्यातील ग्रामपंचायत गोवाडे येथील ग्रामसेवक सतीश भागवत यांचा सत्कार जिल्हा परिषद सदस्या निता पाटील यांच्या हस्ते करण्यात आला. पालघर जिल्ह्यातील दोन ग्रामपंचायतींमधील शौचालयाचे १०० टक्के फोटो अपलोड ग्रामसेवंकानी आदर्श निर्माण केला आहे. या वेळी जिल्हा परिषद अध्यक्षा, उपाध्यक्ष, सदस्य सर्व विषय समित्यांचे सभापती, जिल्हा परिषदेचे मुख्य कार्यकारी अधिकारी, तसेच सर्व विभागप्रमुख उपस्थित होते.
